Pikniku veror me familjet shqiptare ne High Park

Në 28 Korrik, në gjelbërimin e pemëve të larta në High Park Toronto, fëmijë, të rinj, të rritur e të moshuar u mblodhën së bashku për t’u shlodhur e biseduar nën tingujt e muzikës popullore duke shijuar ushqimet tona tradicionale. Pjesëmarrja kësaj radhe ishte edhe më e madhe se vjet, me 140-150 vetë me origjinë nga e gjithë Shqipëria, Kosova e Maqedonia. Më shumë binin në sy të rinjtë dhe fëmijët që nuk rreshtën së kërcyeri së bashku me të rriturit nën tingujt e muzikës së përgatitur me kujdes nga Andi DJ. Grupi i valleve Shqiponjat e Vogla, që po përgatiten intensivisht për 100 vjetorin e Pavarësisë nga koreografi Ramazan Këllezi kërcyen për publikun vallen e tyre të njohur Moj e bukura More, e më pas luajti në piano vogëlushja Dea Dervishi. Grupit të valltarëve që ndërroheshin grupe grupe iu shtuan shpesh edhe kurreshtarë të huaj që afroheshin të tërhequr nga muzika e bukur shqiptare dhe nga era e ushqimeve që gatuheshin në zjarr. Vajzat aziatike në fillim hidhnin dy-tre hapa të ndrojtura në bisht të rrethit por shpejt e merrnin rritmin dhe bëheshin një me grupin shqiptar.

Si çdo vit, çifti i palodhur e simpatik Armandi me Emiljanën u kujdesën për barbeque-në, me pitet dhe qoftet e shijshme të përgatitura për komunitetin nga aktivisti i përhershëm i komunitetit, z. Beadin Qafleshi.

[anything_slider title=”Foto nga aktiviteti” column=”two-thirds” autoslide=”2000″ slider_id=”151″/]

Anëtarët e kryesisë, si gjithmonë kishin marrë përsipër secili detyrën e tij për të siguruar shërbimin e nevojshëm që të gjithë të kënaqeshin. Iliri ndihmoi në sigurimin e qofteve dhe piteve, Ari dhe Irma kryen transportin e ushqimeve. Landi dhe Nardi u kujdesën për gjeneratorin dhe sigurimin e vazhdueshëm të energjisë, lojrat e fëmijëve etj. Këndi i suvenireve dhe i shitjeve u mbulua nga Arta bashkë me vullnetaret Irma Luli, Irma Sengul, Drita Gjikaj. Të gjithë të pranishmit u përshëndetën nga dy të rinjtë Berati dhe Bora, të cilët mblodhën dhe kuotat simbolike për arkën e Shoqatës. Kryetarja Dr. Ruki Kondaj përshëndeti dhe falenderoi të gjithë pjesëmarrësit dhe ata që ishin të rinj në këtë veprimtari i ftoi që të bëhen anëtarë të Shoqatës Shqiptaro-Kanadeze. Gjatë festës u përshëndetën edhe sponsorët dhe anëtarët më të rinj të Shoqatës. Suprizat janë bërë tashmë pjesë e çdo veprimtarie. Këtë vit Dr. Kondaj, në emër të kryesisë i uroi ditëlindjen vogëlushit Xhim Bukuroshi dhe përvjetorin e martesës çiftit simpatik e të pranishëm në çdo aktivitetin tone, Bashkim dhe Irene Breznica.

Dita kaloi në një atmosferë shumë të gëzuar, me këngë, valle, fotografi e njohje të reja. Ndenjëm deri vonë kur dielli perëndoi larg në horizont dhe në park dalëngadalë filloi të bjerë errësira.