Aktivtete të SHBSHK-së me shoqatat e vendeve të Europës Qendrore-Lindore në Kanada (CEEC)
Me datë 21 shkurt , në mjediset e The Polish Combatants Hall, nën kujdesin e Canadian Polish Congress (KPK) u organizua një takim me temë qendrore ligjet e reja të emigracionit në lidhje me punëtorët profesionalë. Ishin të ftuar edhe ekspertë të fushës, përfaqësues federalë, provincialë, nga bashkia e Torontos dhe Ministria e Emigracionit për të sqaruar mbi çështjet që lidhen me punësimin e emigrantëve dhe punëdhënësit në Ontario.
Mbledhja u hap nga presidentja e Kongresit, znj. Teresa Berezowski e cila paraqiti programin e takimit dhe ftoi të gjithë ligjëruesit në tribunë.rnNë fjalimet e tyre u diskutuan në detaje ndryshimet e fundit që qeveria po ndërmerr në ligjin e ri për punëtorët që kanë profesione të ndryshme në mënyrë që ate të gjejnë atë që kërkojnë dhe të ndjehen të mirëseardhur në Kanada duke hyrë menjëherë në rrjedhën e jetës kanadeze me të gjitha të drejtat dhe detyrimet qytetare.
Pati pyetje e diskutime ku kryesisht u kërkua ndryshimi i legjislacionit të Provincës së Ontarios në dobi të lehtësimit të emigracionit duke bërë krahasimin me provinca të tjera të cilat kanë shënuar një rritje të konsiderueshme në rritjen e numrit të emigrantëve profesionistë.
Në këtë veprimtari mori pjesë edhe zëdhënësi i Shoqatës Shqiptaro-Kanadeze në Toronto, z. Ramazan Këllezi, i cili falenderoi organizatorët e takimit për ftesën dhe vlerësoi punën e bërë në këtë drejtim.
Në përfundim znj. Berezowski falenderoi të pranishmit për pjesëmarrjen dhe i ftoi në banketin e shtruar. Ajo sugjeroi që pjesëmarrësit të takohen me njeri-tjetrin dhe të diskutojnë për fushat me interes të përbashkët e përfitim reciprok.
Në datën 23 shkurt, komuniteti estonez në mbarë Kanadanë festoi ditën e 95 vjetorit të pavarësisë së vendit. Në Toronto ky kremtim u mbajt në një nga qendrat e tyre komunitare në 958 Broadview Avenue.
Merrnin pjesë personalitete të larta të shtetit kanadez si ministri i emigracionit z. Jason Keney dhe shumë parlamentarë federalë dhe provincialë. Ishin ftuar të gjithë presidentët e shoqatave komunitare të vendeve të Europës Qendrore dhe Lindore si Polonia, Letonia, Lituania, Ukraina, Hungaria etj. Nga SHBSHK-ja e ftuar ishte presidentja e Shoqatës, dr. Ruki Kondaj.
Pas dëgjimit të hymnit të kënduar kanadez dhe estonez, që edhe pa muzikë tingëlloi si një kor i organizuar në mënyrë perfekte, e mori fjalën presidenti i Shoqatës së Estonisë dhe njëkohësisht president i CEEC, z. Markus Hees.
Organizatorët nderuan me medalje disa individë për kontribute të veçanta në komunitetin e tyre dhe një medalje merite dedikuar ministrit kanadez të emigracionit Keney, i cili ka dhënë një mbështetje të madhe për veprimtarinë e Këshillit të Europës Lindore dhe Qendrore (CEEC).
Mbrëmja u shoqërua nga një koncert festiv në një atmosferë shumë të këndshme dhe mikpritëse për të gjithë pjesëmarrësit.
Edhe Lituania feston Ditën e pavarësisë
Në datën 2 mars 2013, në mjediset ku komuniteti lituan i Torontos zhvillon veprimtari të ndryshme, u organizua një banket-koncert për nder të Ditës së Pavarësisë së shtetit lituan si dhe për presidencën e Këshillit të Bashkimit Europian duke filluar nga 1 korriku 2013.
Presidentja e Lituanisë për Kanadanë, prof Joana Kuras
Mbrëmjen e hapi me një falenderim për të gjithë të pranishmit znj. Jane Macijauskas, presidente e Komunitetit Lituan në Toronto, e cila pas dëgjimit të himnit kanadez dhe atij lituan, ftoi në foltore të tjerë përfaqësues të nderuar të komunitetit si presidenten e Lituanisë për gjithë Kanadanë, prof. Joana Kuras, këshilltarin e ambasadës Lituane në Ottava si dhe dy anëtarë të Parlamentit të Ontarios që uruan përzemërsisht të pranishmit për festën e tyre të Pavarësisë. Të ftuar ishin edhe përfaqësues të komuniteteve të tjera në Toronto si ai polak, hungarez, leton, eston etj. Për të përfaqësuar komunitetin shqiptar ishin të ftuar presidentja e Shoqatës Shqiptaro-Kanadeze, dr. Ruki Kondaj dhe zëdhënësi i kësaj shoqate, z. Ramazan Këllezi. Në emër të vendeve të Europës Qendrore dhe Lindore foli presidenti i CEEC, z. Markus Hees.
Pas përshëndetjeve të mësipërme, në skenë interpretoi grupi muzikor “Pelenai” i ftuar nga Lituania enkas për këtë festë.
Presidentja e Lituanisë për Kanadanë, prof Joana Kuras
Mbrëmja kaloi në një atmosferë tepër festive ku spikati mbi të gjitha mikpritja për të ftuarit. Ajo shërbeu edhe për njohjen reciproke dhe shkëmbimin e ideve racionale në shërbim të komuniteteve tona, duke vënë theksin në një bashkëpunim më të ngushtë në të ardhmen. Komunitetet tona ndajnë mentalitet të ngjashëm dhe kanë probleme të njejta.
