Përkujtimore në nderim të Prof. Dr. Feti Zazanit

Feti Zazani ndërroi jetë në mënyrë natyrale më 27 dhjetor 2013 në Toronto, në moshën 90 vjeçare, në prani të familjes së tij. Shërbesa e përcjelljes së Prof. Fetiut u krye me një protokoll të organizuar shumë mirë në St. John’s Dixie Chapel, Mississauga, Ontario, Canada, në mesditën e datës 29 dhjetor 2013. Dhimbja e largimit të Prof. Fetiut u zbut nga prania e të afërmëve dhe miqve të familjës, kolegëve dhe studentëve të shumtë të tij. Në ekranin e gjerë u shfaqën mesazhet e ngushëllimit nga të afërmit, miqtë dhe kolegët e Profesorit të nderuar nga të katër anët e botës.
Gjatë Shërbimit Përkujtimor u mbajtën fjalime nga Prof. Kristian Bukuroshi – ish koleg, nga vajzat Gerta dhe Lila, nga Saimir Lolja – ish student dhe koleg, Gani Petritaj – ish student; Ramona Prifti – ish studente dhe u kënduan dy pjesë operistike nga sopranoja Margaret Maye, mikeshë e familjes. Shërbimi përkujtimor u mbyll me një jetëshkrim të Prof. Fetiut në formën e një serie pamjesh mbresëlënëse të ruajtura nga familja e tij.
Feti Zazani lindi në Gjirokastër, ndoqi studimet e mesme në degën e Shkencave Natyrore në Liceun e Korçës, dhe u diplomua si inxhinier kimist në prill të vitit 1950, pasi ndoqi studimet e larta në degën e Kimisë Industriale të Universitetit Politeknik të Ëroslavit në Poloni. Me kthimin në Shqipëri, Prof. Fetiu punoi si inxhinier kimist në Fabrikën e Sheqerit në Maliq për dy vjet. Në vitin 1952, ai u emërua Drejtor i Laboratorit Gjeologjik në Tiranë ku punoi për nëntë vjet. Në periudhën 1961-1966, ai punoi si zëvendësdrejtor i Institutit Gjeologjik duke qenë edhe pedagog i jashtëm në Fakultetin e Shkencave Natyrore (FSHN) të Universitetit të Tiranës. Më 1967 u emërua Shef i Katedrës së Kimisë Analitike në FSHN ku punoi derisa doli në pension. Në dhjetor 1999, familja e Prof. Fetiut emigroi në Toronto.
Në të gjithë mesazhet dhe diskutimet, Prof. Fetiu u kujtua si njeri fisnik në jetë e punë dhe familjar i dashur. Prof. Fetiu dhe kolegët e brezit të tij hodhën themelet dhe ndërtuan një shkollë shqiptare të lartë. Ashtu si kolegët e tjerë, Prof. Fetiu harxhoi shumë mund e kohë për të shkruar libra profesionalë në shqip në fushën e tij të Kimisë Analitike. Që nga viti 1953 e deri në vitn 1988, Prof. Fetiu botoi dhjetë libra (tre si bashkëautor) në fushën e Kimisë Ushqimore dhe Kimisë Analitike. Brezi i Prof. Fetiut edukoi me mirësjellje dhe arsimoi në kimi shumë breza studentësh të cilët kudo ku shkuan e punuan i treguan cilësitë e tyre të larta njerëzore e profesionale. Prandaj edhe mirënjohja është e pranishme midis kimistëve shqiptarë, studentë, kolegë, laborantë, profesorë.
Për familjen shqiptare, prindërit janë të pazëvëndësueshëm të paktën për një arësye: sepse janë pikërisht prindërit që nxorrën në dritë fëmijët, i rritën, edukuan e i shkolluan. Familja e Prof. Fetiut e rrethoi atë me kujdes, ngrohtësi dhe nderim deri në fund. Të dashurit e tij do e kujtojnë gjithmonë atë dhe do t’i buzëqeshin kujtimit të tij.
Familja e Prof. Fetiut falenderon të gjithë pjesëmarrësit në shërbimin përkujtimor që i bënë nderimet e fundit Prof. Fetiut si dhe të gjithë studentët, kolegët e FSHN-së, miqtë në Shqipëri, Kanada e kudo në botë, që i dërguan mesazhe ngushëllimi familjes.
Qofshin të lëvduar prindërit.