Dr. Ruki Kondaj dhe z. Fatos Prishtina nderohen me medaljen
Queen Elizabeth II Diamond Jubilee

Duke nderuar jo vetëm një person, por duke treguar vëmendje për të gjithë shqiptarët me banim në Kanada, Governatori i përgjithshëm i Kanadasë vlerësoi me medaljen Queen Elizabeth II Diamond Jubilee Award, në 60 vjetorin e hypjes së mbretëreshës në fronin mbretëror, presidenten e Shoqatës Shqiptaro-Kanadeze në Toronto, Dr. Ruki Kondaj.

Motivacioni i këtij vlerësimi citon: “Për një kontribut të çmuar ndaj komunitetit, vendit të saj dhe Kanadasë”. Dita e zgjedhur ishte pikërisht mbrëmja e madhe e festimit të 100 vjetorit të Pavarësisë së Shqipërisë në Toronto. Medaljen e dorëzoi Ministri i Ekonomisë dhe zhvillimit të Ontarios, Hon. Brad Duguid, në prani të Anëtarit të Parlamentit Federal të Kanadasë dhe përgjegjës për multikulturalizmin, Hon. Jim Karygiannis, Ambasadores së Shqipërisë në Kanada znj. Elida Petoshati dhe Borys Wrzesnewskyj, ish Anëtar i Parlamentit.

Këtë vit jubilar për Mbretëreshën, çmimin e mësipërm do ta marrin rreth 60.000 qytetarë kanadezë që e meritojnë. Midis tyre renditet dukshëm edhe z. Fatos Prishtina, bashkatdhetar i nderuar dhe biznesmen i palodhur në Toronto.